O‘zbekistonda yil boshidan buyon firibgarlik sxemalari uchun 43 ming bank kartasi bloklandi

O‘zbekistonda joriy yilda 17 483 kiberjinoyat fosh etildi, 19 mingdan ortiq fuqaroga jami 209,9 mlrd so‘mdan ortiq zarar qoplab berildi.

Shu bilan birga, IIV tanimlaganki, bunday jinoyatlarning oldini olish va ularni fosh etish bo‘yicha olib borilayotgan chora-tadbirlar hozircha yetarli samarani bermayapti.

Idora ma’lumotlariga ko‘ra, to‘qqiz oy ichida IIV va Markaziy bankning qo‘shma tizimi hisobiga 77,3 mlrd so‘m miqdoridagi mablag‘ning noqonuniy chiqarib yuborilishining oldi olindi hamda jinoyat faoliyati bilan bog‘liq 43 001 bank kartasi bloklandi.

Fosh etilgan kiberjinoyatlarning umumiy sonidan 5 600 tasi huquqni muhofaza qiluvchi organlar xodimlarining tashabbusi bilan aniqlangan. Bundan tashqari, mutaxassislar bank hisob raqamlaridan pul o‘g‘irlashga mo‘ljallangan 38 mingdan ortiq fishing dasturining faoliyatini to‘xtatdi. IIV ma’lumotlariga ko‘ra, bu 668 mingdan ortiq fuqaroning qurilmalari va mablag‘larini himoya qilish imkonini bergan.

Internet-monitoring davomida 6 771 xabar o‘rganilib, 3 192 xavfli resurs bloklandi va firibgarlik bilan bog‘liq 1 446 zararli havolaning faoliyati to‘xtatildi.

IIVdagi yig‘ilishda kiberjinoyatlarning oldini olish, aniqlash va fosh etish samaradorligining yetarli emasligi qayd etildi. Ayniqsa, Toshkent shahri hamda Toshkent, Andijon, Buxoro va Samarqand viloyatlarida kiberxavfsizlikni ta’minlash bo‘yicha ish tanqid qilindi.

Yig‘ilish yakunlariga ko‘ra, mas’ul xodimlarga banklar bilan hamkorlikni kuchaytirish, antifrod tizimlari va «APK Qo'riqchi» platformasidan samaraliroq foydalanish, shuningdek, aholi o‘rtasida profilaktik ishlarni faollashtirish topshirildi.